631
Aufer impietatem de vultu Regis, et firmabitur justitia thronus illius. (Proverb. XXV. 5.)
632
Deus potentes non abjicit, cum et ipse sit potens: sed non salvat impios, et judicium pauperibus tribuit. (Job. XXXVI. 5. 6.) Sedes ducum superborum destruxit Deus. (Eccli. X. 17.) Quoniam data est a Domino potestas vobis, et virtus ab Altissimo, qui interrogabit opera vestra, et cogitationes scrutabitur. (Sap. VI.)
633
Omnis potentia saeculi somnium, non veritas est. (S. Ambros. lib. de Joseph. Patriarch., cap. VI, n. 30.)
634
Rex hodie est, et cras morietur. (Eccli. X. 12.)
635
Felices eos (Principes) dicimus... si plus amant illud regnum, ubi non timent habere consortes...; si luxuria tanto eis castior, quanto posset esse liberior; si malunt cupiditatibus pravis, quam quibuslibet gentibus imperare... Tales Christianos Imperatores dicimus esse felices interim spe, postea reipsa futuros, cum id quod exspectamus, advenerit. (S. Aug. de Civ. Dei, lib. V, cap. XXIV.)
636
Quam miserae etiam hic Regum conditiones... quam mutabiles imperii status, quam exigua vitae hujus spatia, quanta in ipso imperio servitia; cum ad aliorum, non ad suum vivant arbitrium. (S. Ambros. ad Iren. Epist. clas. I, ep. XXIX, n. 18.)
637
Nemo quod suum est quaerat, sed quod alterius. (I. Cor. X. 24.) Non quaerit (charitas) quae sua sunt. (I. Cor. XIII. 5.)
638
Non quaerens quod mihi utile est, sed quod multis. (I. Corint. X. 33.)
639
Omnes enim quae sua sunt quaerunt. (Philip. II. 21.)
640
Libet videre hunc rhinocerotem, id est, terrae principem fidei loris ligatum, quemadmodum et cornu portat per potentiam saeculi... Timeri iste rhinoceros valde poterat, nisi ligatus esset. Cornu quippe habet, sed ligatus est... Strictus enim loris, servat pietatem mansuetudinis, sed fultus cornu terrenae gloriae exercet dominium potestatis. Plerumque autem cum exigente ira ad feriendum rapitur, divino timore revocatur. Et quidem per exasperatam potentiam in furorem se elevat, sed quia aeterni judicis reminiscitur, cornu ligatus se inclinat. (S. Greg. M. lib. XXXI, in cap. XXXIX. B. Job., cap. IV, n. 5.)