411
Ecce ego vobiscum sum omnibus diebus usque ad consummationem saeculi. (Matth. XXVIII. 20.) Super hanc petram aedificabo Ecclesiam meam, et portae inferi non praevalebunt adversus eam. (Matth. XVI. 18.)
412
Reges contra Evangelium praeliati sunt, et tyranni bella gesserunt, et populi omnes insurrexerunt; et nostra usque adeo attrita non sunt, ut inde fierent clariora. (S. Joan. Chrysost. de Laud. Pauli homil. IV.)
413
(Imperatores) illi qui saevierunt, destructi sunt... Quando dixerunt, tollamus eos de terra, non erit nomen Christianum si hoc fecerimus; sic occidantur, sic torqueantur, talia et talia illis infligantur: dicta sunt haec, et inter haec crevit Ecclesia. (Idem in Ps. XXXII. enarr. III, n. 13.) Jam tenentes sceptrum subduntur ligno crucis: jam fit quod praedictum est: Adorabunt eum omnes Reges terrae, omnes gentes servient illi. Jam in frontibus Regum pretiosius est signum crucis, quam gemma diadematis. (Idem in Ps. LXXIII, n. 6.)
414
Julianus exstitit infidelis Imperator, exstitit apostata, iniquus, idololatra: milites Christiani servierunt Imperatori infideli; ubi veniebatur ad causam Christi, non agnoscebant nisi illum qui in caelo erit. Si quando volebat ut idola colerent, ut thurificarent; praeponebant illi Deum: quando autem dicebat, Producite aciem, ite contra illam gentem; statim obtemperabant. Distinguebant dominum aeternum a domino temporali: et tamen subditi erant propter dominum aeternum etiam domino temporali. (Id. En. in Ps. CXXIV, n. 7.)
415
Jubentur servi ferre dominos iniquos et difficiles: cives Babyloniae jubentur tolerari a civibus Jerusalem, et amplius obsequiorum exhibentibus, quam si cives essent ex ipsa Babylonia. (Idem Enarr. in Ps. LXI, n. 8.)
416
Vos ergo contemplatione Domini Jesu etiam si difficilibus serviatis dominis cum patientia mercedem habebitis. Siquidem ipse dominus justus ab injustis passus est. (S. Ambros. Epist. ad Vercellens. Eccles., clas. I, epistol. LXIII, n. 112.)
417
Christus vincebat non cruci affigens, sed cruci affixus; non alapis caedens, sed alapis caesus... Nam cum fulmina vibrare posset, ac terram concutere, servique manum arefacere; nihil horum fecit, sed et se purgat, et superat benignitate. (S. Joan. Chrys. Hom. in S. Phocam M., n. 2.)
418
Et ut corroboraret servum, hoc dixit, Exemplo meo servi, prior servivi iniquis. Dominus enim tanta in passione sustinens, a quibus sustinuit nisi dominus a servis? Et a quibus, nisi a malis servis? Nam si fuissent boni servi, honorarent dominum. Sed quia mali servi erant, injuriaverunt. Ille quid contra? Reddidit dilectionem pro odio. Ait enim: Pater ignosce illis, quia nesciunt quid faciunt. (Luc. XXIII. 34.) Dominus caeli et terrae per quem facta sunt omnia, servivit indignis... quanto magis non debet dedignari homo ex toto animo, et ex tota bona voluntate, cum tota dilectione servire domino etiam malo? Ecce servit melior deteriori, sed ad tempus. Quod autem dixi de domino et servo, hoc intelligite de Potestatibus et Regibus, de omnibus culminibus hujus saeculi. Aliquando enim potestates bonae sunt, et timent Deum; aliquando non timent Deum. (S. Aug. Enarr. in Psalm. CXXIV, n. 7.)
419
Securus esto bonus etiam in medio malorum... Domus Dei Ecclesia est, adhuc habet malos; sed decor domus Dei in bonis est. (Idem in Psalm. XXV, num. 12.)
420
In omni congregatione multitudinis necesse est ut inveniantur mali... Novit enim Deus necessarium esse nobis ut feramus malos, et proficiat quod boni sumus. (Idem in Ps. LIV, n. 9.)